Archive for the ‘سكتشات عامة’ Category

عفوا , مكتئب [2] !

Posted: ديسمبر 4, 2009 in سكتشات عامة

احم نكمل ..

منذ فترة .. كنت انوى كتابه هذا الموضوع .. وفى كل مرة كنت أؤجله بسبب انى مشغول وورايا حاجات مهمة بعملها ..

نسبيا.. بحاول اتخلص من الانشغال الفظيع ده .. لذلك سأكتب !!

فى احد الاثار والله اعلم بصحته عن سيدنا داوود , انه أتاه ملك الموت , فقال له ما الذى اتى بك؟ قال اترى ذلك الشاب .. أ ُمرت ان أقبض روحه عندما يخرج من الباب .. فخرج الشاب وخرج وراءه ملك الموت ,و بعد عشرين عاما , اتاه ملك الموت مرة اخرى , ليقبض روح نفس ذلك الشاب , فتعجب سيدنا داوود , فقال له ملك الموت , عندما خرج ذلك الشاب من الباب منذ عشرين عاما .. تصدق على امرأة عجوز كانت تجلس بجوار الباب , فمد الله عمره عشرين عاما بسبب هذا ..

هنا نتوقف عند اية فى سورة فاطر .. (ومايعمر من معمر ولا ينقص من عمره إلا فى كتاب إن ذلك على الله يسير )

لحظه كده , واخدلى بالك ؟ اعمالك اللى بتعملها دلوقت بتأثر ف عمرك .. متخيل ؟ من الممكن ان يمد عمرك عشر سنين مثلا بسبب برك لوالديك , او ينقص منه بسبب معصيه مثلا , اليس من الاحرى اننا نخلى بالنا من اللى بنعمله ؟ مش انا اللى بقول كده اقرا الأيه تانى..

دى مقدمه بس ..ندخل ف الموضوع بقي ..

كنت قد ذكرت شيئا عن نظريه بعنوان ” هذه حياتى وانا سأكتبها ” , تلك النظريه مبنيه بشكل كبير على المقدمه التى ذكرتها , سأتناولها بشئ من التفصيل والايجاز بعد قليل .

اود فقط ف البدايه ان اذكر بقصه سيدنا يوسف , ذلك النبي الذي لم يكن سعيد الحظ مع اخوته , فيتأمرون على قتله وبعدها يخففون قرارهم من القتل الى الرمي فى البئر , ليأخذه بعض المارون فيبيعوه بعدها الى عزيز مصر , وهناك فى قصر العزيز يتعرض للفتن ويلقي فى السجن قرابه الست سنوات , وبعدها يخرج ويتولى منصب الوزير و ياتى التمكين ليصبح عزيز مصر , ويشاء الله ان يلقي بإخوته فيعرفهم , ويعود اليه ابوه بعد كل هذا .

السؤال هنا , هل كانت النهايه تستحق هذا العناء ؟

(المزيد…)

Advertisements

عفوا, مكتئب !

Posted: نوفمبر 27, 2009 in سكتشات عامة

مرة من فترة كده كنت مخنوق اوى .. خليها عربي احسن بلاش عاميه .

منذ فترة ليست بالبعيده , اصابنى بعض الاكتئاب الممل .. اكتئاب من ذلك النوع اللذى تعرف انه سيصيبك قبل ان يصيبك .. لهذا كان الشعور به مملا ! والادهى من ذلك انك تعرف سبب هذا الاكتئاب ولا تريد ان تتخذ قرارا ! بالبلدى كده لا بحبك ولا قادر على بعدك .. فلذه الألم المصاحبه لهذا الاكتئاب تطغى على اصله فتزيده حلاوة وتجعل منه ألما من طعم لا يوصف , حسنا كان هذا من فترة وليس الان ولا اريد ان اتذكر تلك الحالة , المهم عادة ما اكتب تبعا لحالتى النفسيه , فبالتالى عليك ان تخمن ان كل كتاباتى فى تلك الفترة كانت سوداويه ويغلب عليها طابع الانتحار المرتبط ارتباطا وثيقا بالاكتئاب .. الغريب انى منذ دقائق معدودات قرأت هذه الكتابات فشعرت بالاشمئزاز .. طبعا ليس لانى اصبحت سعيدا وغير مكتئب .. لكن لا ادري شعرت بالاشمئزاز وخلاص !

دعنى اعرض عليك بعضا من تلك الكتابات (لست مجبرا على قرائتها .. نصيحه منى .. لا تقرئها )

ان تفقد احدهم ….يعنى ان حلقك قد جف الى الأبد وان الماء الذى كنت ترتوى منه قد نفذ …وان ترى الماء يجرى حولك ولكنك ببساطة لا تستطيع امساكه..ان تفقد احدهم …اشبه بمن فقد عينيه او اذنيه ..فكلاهما قد حُرموا من رؤية وسماع من احبوا ..اشبه بمن فقد الدرب  ..اشبه بمن ضل طريقه فى وضح النهار..اشبه بمن زرع شجرة صبار يأكل منها كل صباح …اشبه بمن يكحل عينيه بالملح …

ان تفقد احدهم ..تعنى ان البسمة قد غادرت شفتاك الى الابد ..وان الالم قد اختار من قلبك منزلا..وان الحزن قد عرف طريقه الى عينيك .. وان الشمس قد فقدت لونها ..وان البحر قد فقد زرقته ..وان السماء قد فقدت صفائها وان الأمل قد فارق الحياة ..وان السعادة قد دفنوها فى ظلمة الليل التعيس ..

كما ترى .. حاجة اخر قرف !! من هنا استنتجت استنتاجين فى غايه الاهمية ..الاول , مش هاحط ايدي على كيبورد وانا مكتئب !!  اما الاستنتاج الاخر .. بعض الاشخاص علي ان اعاملهم ببعض الحرص وانا مكتئب . دعكم من هذه الخاطرة السريعه .. ندخل فى موضوعنا ..

منذ فترة ليست بالقريبه ولا البعيده ..  اتى على ذهنى احد تلك الاسئله .. ماذا يحدث لو ؟؟؟ ماذا يحدث لو استيقظت من نومى فوجدت سته ألاف جنيه بانتظارى على المكتب لاخذهم فورا واشترى تلك الكاميرا من نوع سونى والتى احلم بها ؟؟ حسنا بلاش دى , وسعت منى شويه , ماذا يحدث لو طرق الباب فوجدت شابا وسيمايبتسم فى وجهى ليخبرنى انه مدوب لشركه سونى وانه قد تم اختيارى ضمن مجموعه عشوائيه لتجربه اخر منتجاتهم ؟؟ لماذا لا تحدث تلك الاشياء ببساطة ؟؟ ماذا سيحدث لو ذاكرت وأتى الامتحان من الجزئيه التى ذاكرتها وحصلت على تقدير امتياز ؟؟ ماذا سيحدث لو فزت بالسيارة البي ام فى مسابقه البقرة الضاحكة ؟؟ لماذا لا استيقظ على صوت تليفونى .. فأجيب بسرعه على الهاتف بدون ان الاحظ ان المتصل هى ندا لتخبرنى بكل سهوله انها تحبنى وتعشقنى حتى الموت !! ماذا سيحدث حينها ؟؟ فيها ايه يعنى ؟؟ ايه اللى هيحصل ؟؟ اعتقد لا شئ جدير بالذكر سيحدث .. لن ينتهى العالم .. لن يؤثر ذلك على فوز المنتخب .. لن يزيد ذلك من عدد مدمنى المخدرات ولن يقلل من عدد سارقي ملابس الغسيل !! كل الحكايه انى سأصبح سعيدا .. ليس إلا !! حسنا لماذا لا يتحقق هذا ؟؟ ام انى كُتِب على ان اجد العضمة فى الكرشه حتى اموت !! لماذا لا اجد قدرا ولو ضئيلا من تلك السعادة التى يتكلم عنها الناس ؟؟ اعتقد حقا انى فى هذه الفترة فى  امس الحاجة الى ذلك القدر القليل من الحظ !

حسنا .. بعد ان كاد هذا السؤال ان يقتلنى .. قلت فى قرارة نفسي .. لابد من وقفه .. لابد من حل , ماينفعش الموضوع يستمر هكذا الى الابد !! لو استمر هكذا اعتقد انى فى نهايه المطاف سأتجوز واحده من الصومال الشقيق !! هذا ان كانت الصومال الشقيق لا يطلقون على بناتهم القاباً مثل “ندا” !!

نعود الى موضوعنا .. بعد جلسه مطوله دامت لمدة طويله .. قرابه الخمس ثوان , استنتجت عده استنتاجات تتعلق بتشخيص المشكله التى اعانى منها (سوء الحظ) :

(المزيد…)

My New Avater

Posted: سبتمبر 11, 2009 in سكتشات عامة

Batman

من كام يوم خلصت لعبة باتمان اركام أسايلم  Batman Arkham Asylum

اللعبة رهيبة فعلا وفوق الوصف !! ..

تقريبا افضل لعبة لعبتها من مدة طويلة … لدرجة انها كرهتنى ف بقيت الالعاب 😀

المهم مش ده موضوعنا .. هابقي انزل موضوع تانى اتغزل ف اللبعة ..

من مده نفسي احدث الافاتر بتاعى .. ارسمه تانى من الاول بشكل افضل بما ان مستوايا ف الرسم اتحسن عن ذي قبل .. لكن كالعادة كنت مكسل .. فلما لعبت اللعبة دى شجعتنى شوية انى افحتح الفوتوشوب وألعب ف الافاتر ..

المهم ده الافاتر القديم بتاعى .. لبسته وش باتمان .. وحطيتله حبة تفاصيل .. لو دققت ممكن تشوفغ عينه وحتة من وشة ..

بما انى اشتركت فى اخر يوم فى المسابقة … لم اجد حلا اخر سوى انى استخدم بعض تلك العنواين الجذابة … مثلما تفعل الصحف الصفرا والمنتديات الخليجية وطبعا مزعجوا الاسبام !..  قديما كنت من اشد المعارضين لمثل هذا الاسلوب الغير لبق اطلاقا .. لكن اليوم .. لا مفر من استخدامه .. والا سيكون مئال هذا المقال الى … (لانى مؤدب لن اقول الزبالة ).

كنت افكر ف استخدام اسما اكثر جذبا وملفتا للنظر بطريقة اكبر .. مثلا مقال جنسي جدا .. لكن بالطبع لا افكر ابدا فى خسارة صداقتى مع ادارة المنتدى فى الوقت الحالى.. لذلك قررت استخدام عنوان اخف وطأة ويكون له ذلك التأثير الساحر فى جذب أعين القراء.

ربما علي الان ان اقدم مقالا فقيعا او ذو محتوى عقيم.. عقابا لكل من دخل هذا  الموضوع بنية سيئة.. لكن دعنى اخبرك شيئا… انا محترم ومش هاعمل كده .

اذكر ذات يوما ايام الابتدائية .. كان عندنا امتحان عربى… كتبت للمدرس..حل السؤال الثانى فى الصفحة الاخيرة..عندما فتح المدرس الصفحة الاخيرة.. وجد كلمة “بعته” مكتوبة بالخط العريض … لا انكر ماحدث لي بعدها ولا استطيع نسيان طعم عصايته الخشبية من ذلك النوع الفريد الذي يترك اثرا لفترة طويلة.. لك الحقيقة تقال ايضا.. كان مدرس رخم و يستحق ما حدث له.

حسنا.. مانا بصدد التكلم عنه الان امر فى غاية الاهمية ويمسنا جميعا   (المزيد…)

stand still

Posted: يوليو 6, 2009 in سكتشات عامة

9

بصيص الامل !!!

Posted: مايو 9, 2009 in سكتشات عامة

السلام عليكم…

كيفكم؟؟؟

وحشتونى (بكدب طبعا 😀 )

المهنز.. ندخل فى الموضوع على طول…

حضرت النهاردة محاضرة دكتور طارق ,بتاعت مايكروسوفت , اللى اعلانها فوق دى…

فيه حاجة زعلتنى… وفيه حاجة فرحتنى…

اللى زعلنى انى مالقيتش اى حد اعرفوا هناك.. غير هيستا اللى كنا رايحين مع بعض..

كانت مفيدة جدا جدا.. على فكرة , انا استفدت منها كتييير اوى, واكثر حاجة استفدت منها انها ادتنى دفعة للامام.. عشان اكمل فى الحوار اللى انا ناوى ابدأ فيه ان شاء الله…

خصوصا بعد الاحباط اللى جالى لما قريت عن موضوع الطاقة وذروة البترول وحضرت محاضرة دكتور حاتم اللى اتكلم فيها عن الموضوع ده…ده قعدت يجي حوالى اسبوع مكتئب ومتنكد وماشي بوزع كئابة واحباط ع الناس

احم..المهم.. الحاجة اللى فرحتنى .. زى ما قلت كده من شوية..حوار الامل ده

لانى داخل بإذن الله على موضوع صعب.. وكل اللى اكلمه فيه يحبطنى اكتر .مافيش داعى اتكلم فيه دلوقت مش وقته خالص 😀

المهم, نرجع تانى للمحاضرة...زى ماقولت المحاضرة كانت مفيدة جدا وممتعة بدرجة كبيرة, بجد اللى ماحضرهاش فاته كتير اوى

دى الصورة اللى اخدناها فى الاخر …

حاطيتها رخامة وتناحة.. مالكش فيه

ايه بقي اللى انت استفدته من المحاضرة دى ؟؟… لخصهلنا بسرعة كده؟؟..

بصراحة ماليش فى حوار التلخيص ده… لان غالبا بنسي كل حاجة بعد ما المحاضرة تخلص غير كده كمان, ماليش نفس الخص دلوقت…

امال انت حاطط الموضوع ده تصدعنا وتقرفنا وخلاص!!!!

اصبر بس , جايلك فى الكلام اهه..

وانا قاعد فى المحاضرة, افتكرت حاجة كده, ودى السبب الرئيسي بتاع الموضوع,

كنت مرة فى ندوة زى كده بس لاحمد بهجت, اكيد تسمعوا عنه

الراجل بردوا قعد يتكلم عن مستقبل مصر والصناعة والبيزنس ومش عارف ايه كده…

المهم ,الراجل حكى فى النص موقف كده

مرة كان فى ندوة تانية و بعد ما الندوة خلصها, قال اى حد عنده فكره جديدة لمشروع قابله للتنفيذ انا مستعد اتبناها من الصفر,

احم .. متخيل الموقف ؟؟؟؟؟؟

واحد بيعرض عليك فلوووس عشان ينفذ مشروعك..

. الفاجعة بقي,

ان اللى راح ليه هو واحد بس !!!!!

تخيل, وراح قاله انا عندي فكرة لمشروع بس انا قدامى لسه الجيش,, ممكن تستنانى و بعد ما اخلص اجيلك

ايه المشكلة بقي؟؟؟

ماحدش عنده افكار, ماحدش عنده اهداف, عايشين وخلاص ,

المهم, انا تخيلت نفسي احد المتواجدين

كنت هاقول ايه لاحمد بهجت؟؟؟؟ ايه هو مشروعى اللى عايش عشانه؟؟؟ ايه هى فكرتى اللى قايم نايم عمال احلم بيها؟؟؟
مش مفاية فكرة بس , الاهم يكون فيه مشروع ينفع يتطبق ولا لأ…

بعد ما عصرت دماغي,, لقيت معظم مشاريعى هايفة…

باختصار, مالقيتش حاجة تستحق انها تتقال, مافيش فكرة جايبه همها, كلها افكار تقليدية…

جه فى دماغى حاجة وانا عمال بفكر كده…

ياترى لو مت, هاقول لربنا ايه؟؟؟ هاجاوب عليه بإيه لما يسألنى ويقولنى نفعت أمتك ودينك ازاى؟؟؟

اذا كنت مالقيتش اجابة لاحمد بهجت, مابالك بربنا بقي,,

من هنا قلت لنفسي لازم اعيد ترتيب بعض الحسابات فى حياتى واعيد النظر فى بعض الامور,

دلوقت بقي , السؤال المهم,

ايه هيا فكرتك انت ؟؟؟؟

السلام عليكم …

ماتخدش فى بالك...شكلها كده هتكون سلسلة مواضيع يكتبها لكم لؤى حاتم من امام مبنى الاذاعة والتلفزين.. احم
فيه مواضيع تافه.. ودى هاسميها ماتخدش فى بالك.. وانصحك بعدم قرائتها.. وفى مواضيع جد..ودى هاسميها..“خد بالك” ياريت تقراها..اعتقد انها ممكن تكون مفيدة الى حد ما..

المهم نخش فى الموضوع لأنى مش قادر بصراحة اكتب اى مقدمة مملة المرة دى..

هاحكى موقفين بسرعة كده…

الموقف الاول….

-واد يالؤى.. انت ماعرفتش؟؟
-عرفت ايه؟؟؟
-مش احمد مات..
-نعم…اكيد بتهزر!!!
-انت عبيط..هو فيه هزار فى الحاجات دى

ده حوار حصل امبارح بينى وبين احد الاشخاص ع المسنجر….مين احمد بقي اللى مات ده ؟؟؟
احمد ده واحد صاحبى فى العشرين فى عمره…كان تعبان بقاله فتره..عمل عملية من شهر تقريبا...وتعب اكتر بعد العملية..ومات بعدها
طبعا اللى يقدر يدعيله ياريت ماينساش…
طب انا ليه عملت الموضوع ده …اكيد عشان افضفض شوية… وعشان تدعوله… وحاجة اهم من كل ده طبعا…
هاقولها دلوقت بس هاذكر اخر حوار دار بينى وبين احمد قبل مايموت
غائب للأبد..ماحدش يكلمنى.. دى كانت الاستايتوس بتاعت احمد
فتحت معاه حوار..
مالك يابو حميد ايه اللى مضايقك؟؟
-مافيش ..حبة تعب كده
-احكى طب يابنى صدعنى biggrin.gif
-معلش مش هاقدر..لما بتكلم فى الموضوع ده نفسيتى بتنهار
(قلت فى سري..تلاقيه عنده مشكلة ولا لسه خارج من صدمة عاطفية ولا حاجة..حاله كحال معظم المخنوقين عندى ع المسنجر)
-طب ياعم فرفش كده امال..
-انا احتمال اسافر ومش هارجع تانى..ياريت لو كنت ضايقت حد يسامحنى..ادعيلي ربنا يغفرلي
المهم سيبته.. قولت حبة والواد هيرجع لطبيعته…عادى يعنى
لكن للأسف…احمد مارجعش تانى…
متخيل اما تكلم حد..ويكون عارف انه هيموت !!!
نخيل نفسك مكانه…تخيل نفسك على موعد مع الموت…تخيل نفسك عمال بتعد الايام اللى باقيالك فى الدنيا…طموحاتك احلامك..أمالك..حياتك..دراستك ..اصحابك..كل ده هينتهى بعد كام يوم…
صعبة اوى…


لا تركنن إلى الدنيا وما فيها *** فالموت لا شك يفنينا ويفنيها
المرء يبسطها والدهر يقبضها *** والنفس تنشرها والموت يطويها

الموقف التانى…. (المزيد…)