ألا يا نائم الليل كيف المنام يطيب…ياريت تاخد بالك..3

Posted: مايو 5, 2009 in سكتشات عامة

السلام عليكم …

ماتخدش فى بالك...شكلها كده هتكون سلسلة مواضيع يكتبها لكم لؤى حاتم من امام مبنى الاذاعة والتلفزين.. احم
فيه مواضيع تافه.. ودى هاسميها ماتخدش فى بالك.. وانصحك بعدم قرائتها.. وفى مواضيع جد..ودى هاسميها..“خد بالك” ياريت تقراها..اعتقد انها ممكن تكون مفيدة الى حد ما..

المهم نخش فى الموضوع لأنى مش قادر بصراحة اكتب اى مقدمة مملة المرة دى..

هاحكى موقفين بسرعة كده…

الموقف الاول….

-واد يالؤى.. انت ماعرفتش؟؟
-عرفت ايه؟؟؟
-مش احمد مات..
-نعم…اكيد بتهزر!!!
-انت عبيط..هو فيه هزار فى الحاجات دى

ده حوار حصل امبارح بينى وبين احد الاشخاص ع المسنجر….مين احمد بقي اللى مات ده ؟؟؟
احمد ده واحد صاحبى فى العشرين فى عمره…كان تعبان بقاله فتره..عمل عملية من شهر تقريبا...وتعب اكتر بعد العملية..ومات بعدها
طبعا اللى يقدر يدعيله ياريت ماينساش…
طب انا ليه عملت الموضوع ده …اكيد عشان افضفض شوية… وعشان تدعوله… وحاجة اهم من كل ده طبعا…
هاقولها دلوقت بس هاذكر اخر حوار دار بينى وبين احمد قبل مايموت
غائب للأبد..ماحدش يكلمنى.. دى كانت الاستايتوس بتاعت احمد
فتحت معاه حوار..
مالك يابو حميد ايه اللى مضايقك؟؟
-مافيش ..حبة تعب كده
-احكى طب يابنى صدعنى biggrin.gif
-معلش مش هاقدر..لما بتكلم فى الموضوع ده نفسيتى بتنهار
(قلت فى سري..تلاقيه عنده مشكلة ولا لسه خارج من صدمة عاطفية ولا حاجة..حاله كحال معظم المخنوقين عندى ع المسنجر)
-طب ياعم فرفش كده امال..
-انا احتمال اسافر ومش هارجع تانى..ياريت لو كنت ضايقت حد يسامحنى..ادعيلي ربنا يغفرلي
المهم سيبته.. قولت حبة والواد هيرجع لطبيعته…عادى يعنى
لكن للأسف…احمد مارجعش تانى…
متخيل اما تكلم حد..ويكون عارف انه هيموت !!!
نخيل نفسك مكانه…تخيل نفسك على موعد مع الموت…تخيل نفسك عمال بتعد الايام اللى باقيالك فى الدنيا…طموحاتك احلامك..أمالك..حياتك..دراستك ..اصحابك..كل ده هينتهى بعد كام يوم…
صعبة اوى…


لا تركنن إلى الدنيا وما فيها *** فالموت لا شك يفنينا ويفنيها
المرء يبسطها والدهر يقبضها *** والنفس تنشرها والموت يطويها

الموقف التانى….

حصل امبارح بردوا وانا فى صلاة العشاء…كنت لسه عارف خبر وفاة احمد من شوية…
المهم..فى الركعة التالتة...واحنا نازلين للسجود…سمعت صوت حاجة جنبى دبت على الارض….بصيت كده بطرف عينى
اللى كان بيصلي جنبي مرمى ع الارض مابيتحركش…
فى هذه اللحظة..بعض الناس بدأت تعلي صوتها..لا اله الا الله..انا لله وانا اليه راجعون..كل ده واحنا لسه فى الصلاة

انا تيقنت تماما ساعتها ان الراجل مات….خلصنا صلاة.. الناس اتلمت حواليه وقعدوا يقلبوا فيه…وطبعا اول حاجة شافوها كانت النبض… واول صوت طلع كان.. لاحول ولا قوة الا بالله ده مافيش نبض!!!

فى هذه اللحظة خدت شبشبي وطلعت على بيتنا… متخيل اما حد يموت جنبك!!!!!!… من غير ماعرف اذا كان الراجل ميت ولا اغم عليه..بصراحة ماكنتش هاستحمل..خبطتين ع الراس فى نفس اليوم!!.. توجع بصراحة..

بعديها عرفت..الراجل فاق الحمد لله…هو جاى من الفيوم بقاله اربع ايام.. بيدور على شغل..ومايعرفش حد فى القاهرة….

نفس الحكاية…تخيل نفسك مكانه… غريب عن بلدك.. ماتعرفش حد…وفجأة…انفاسك فى الحياة خلصت!!!

الشاهد بس
ملك الموت الذي تعداك واخذ روح غيرك …سيتعدا غيرك وياخذ روحك

الموقف التالت…..

انت مش قلت اتنين.. اه قلت.. رخامة وانت مالك..

من كام اسبوع كده والد احد اصدقائي توفى…المهم ..عزيناه طبعا وعملنا معاه الواجب…
من كام يوم كده..لقيت واحد صاحبي بيقولى.. انت ماجيتش تعزى ليه؟؟؟؟
قلتله سلامة نظرك امال مين اللى كان راكب جنبك فى العربية… قالى انا مش قصدى على ابو ابراهيم .. انا قصدى على ابو حمادة
قلتله نعم… هو مات امتى؟؟؟
قالى الاربع اللى فات..

انا بقول ليه الموقف ده… اولا لأنى لسه ماعزيتش صاحبى ده.. ومكسوف من نفسي جدا على تقصيري معاه
ثانيا .. افتكرت نفس الجملة اللى كتبتها فوق.. بس بصيغة مختلفة شوية..

ملك الموت الذي تعدا ابيك واخذ روح غيره …سيتعدا غيره وياخذ روح ابيك

بس كده…..
اسف طبعا اذا كنت عكرت مزاج حد…
بصراحة ماعرفش حد غيركوا اوجع دماغه… غير كده… صدمة كمان لو حصلتلى .. احتمال تيجوا تعزوا فيا!!!!!
ولعل وعسي حد يستفاد من المواقف دى…
أراكم على خير…

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s