أرشيف لـمايو, 2009

بصيص الامل !!!

Posted: مايو 9, 2009 in سكتشات عامة

السلام عليكم…

كيفكم؟؟؟

وحشتونى (بكدب طبعا 😀 )

المهنز.. ندخل فى الموضوع على طول…

حضرت النهاردة محاضرة دكتور طارق ,بتاعت مايكروسوفت , اللى اعلانها فوق دى…

فيه حاجة زعلتنى… وفيه حاجة فرحتنى…

اللى زعلنى انى مالقيتش اى حد اعرفوا هناك.. غير هيستا اللى كنا رايحين مع بعض..

كانت مفيدة جدا جدا.. على فكرة , انا استفدت منها كتييير اوى, واكثر حاجة استفدت منها انها ادتنى دفعة للامام.. عشان اكمل فى الحوار اللى انا ناوى ابدأ فيه ان شاء الله…

خصوصا بعد الاحباط اللى جالى لما قريت عن موضوع الطاقة وذروة البترول وحضرت محاضرة دكتور حاتم اللى اتكلم فيها عن الموضوع ده…ده قعدت يجي حوالى اسبوع مكتئب ومتنكد وماشي بوزع كئابة واحباط ع الناس

احم..المهم.. الحاجة اللى فرحتنى .. زى ما قلت كده من شوية..حوار الامل ده

لانى داخل بإذن الله على موضوع صعب.. وكل اللى اكلمه فيه يحبطنى اكتر .مافيش داعى اتكلم فيه دلوقت مش وقته خالص 😀

المهم, نرجع تانى للمحاضرة...زى ماقولت المحاضرة كانت مفيدة جدا وممتعة بدرجة كبيرة, بجد اللى ماحضرهاش فاته كتير اوى

دى الصورة اللى اخدناها فى الاخر …

حاطيتها رخامة وتناحة.. مالكش فيه

ايه بقي اللى انت استفدته من المحاضرة دى ؟؟… لخصهلنا بسرعة كده؟؟..

بصراحة ماليش فى حوار التلخيص ده… لان غالبا بنسي كل حاجة بعد ما المحاضرة تخلص غير كده كمان, ماليش نفس الخص دلوقت…

امال انت حاطط الموضوع ده تصدعنا وتقرفنا وخلاص!!!!

اصبر بس , جايلك فى الكلام اهه..

وانا قاعد فى المحاضرة, افتكرت حاجة كده, ودى السبب الرئيسي بتاع الموضوع,

كنت مرة فى ندوة زى كده بس لاحمد بهجت, اكيد تسمعوا عنه

الراجل بردوا قعد يتكلم عن مستقبل مصر والصناعة والبيزنس ومش عارف ايه كده…

المهم ,الراجل حكى فى النص موقف كده

مرة كان فى ندوة تانية و بعد ما الندوة خلصها, قال اى حد عنده فكره جديدة لمشروع قابله للتنفيذ انا مستعد اتبناها من الصفر,

احم .. متخيل الموقف ؟؟؟؟؟؟

واحد بيعرض عليك فلوووس عشان ينفذ مشروعك..

. الفاجعة بقي,

ان اللى راح ليه هو واحد بس !!!!!

تخيل, وراح قاله انا عندي فكرة لمشروع بس انا قدامى لسه الجيش,, ممكن تستنانى و بعد ما اخلص اجيلك

ايه المشكلة بقي؟؟؟

ماحدش عنده افكار, ماحدش عنده اهداف, عايشين وخلاص ,

المهم, انا تخيلت نفسي احد المتواجدين

كنت هاقول ايه لاحمد بهجت؟؟؟؟ ايه هو مشروعى اللى عايش عشانه؟؟؟ ايه هى فكرتى اللى قايم نايم عمال احلم بيها؟؟؟
مش مفاية فكرة بس , الاهم يكون فيه مشروع ينفع يتطبق ولا لأ…

بعد ما عصرت دماغي,, لقيت معظم مشاريعى هايفة…

باختصار, مالقيتش حاجة تستحق انها تتقال, مافيش فكرة جايبه همها, كلها افكار تقليدية…

جه فى دماغى حاجة وانا عمال بفكر كده…

ياترى لو مت, هاقول لربنا ايه؟؟؟ هاجاوب عليه بإيه لما يسألنى ويقولنى نفعت أمتك ودينك ازاى؟؟؟

اذا كنت مالقيتش اجابة لاحمد بهجت, مابالك بربنا بقي,,

من هنا قلت لنفسي لازم اعيد ترتيب بعض الحسابات فى حياتى واعيد النظر فى بعض الامور,

دلوقت بقي , السؤال المهم,

ايه هيا فكرتك انت ؟؟؟؟

Advertisements

السلام عليكم …

ماتخدش فى بالك...شكلها كده هتكون سلسلة مواضيع يكتبها لكم لؤى حاتم من امام مبنى الاذاعة والتلفزين.. احم
فيه مواضيع تافه.. ودى هاسميها ماتخدش فى بالك.. وانصحك بعدم قرائتها.. وفى مواضيع جد..ودى هاسميها..“خد بالك” ياريت تقراها..اعتقد انها ممكن تكون مفيدة الى حد ما..

المهم نخش فى الموضوع لأنى مش قادر بصراحة اكتب اى مقدمة مملة المرة دى..

هاحكى موقفين بسرعة كده…

الموقف الاول….

-واد يالؤى.. انت ماعرفتش؟؟
-عرفت ايه؟؟؟
-مش احمد مات..
-نعم…اكيد بتهزر!!!
-انت عبيط..هو فيه هزار فى الحاجات دى

ده حوار حصل امبارح بينى وبين احد الاشخاص ع المسنجر….مين احمد بقي اللى مات ده ؟؟؟
احمد ده واحد صاحبى فى العشرين فى عمره…كان تعبان بقاله فتره..عمل عملية من شهر تقريبا...وتعب اكتر بعد العملية..ومات بعدها
طبعا اللى يقدر يدعيله ياريت ماينساش…
طب انا ليه عملت الموضوع ده …اكيد عشان افضفض شوية… وعشان تدعوله… وحاجة اهم من كل ده طبعا…
هاقولها دلوقت بس هاذكر اخر حوار دار بينى وبين احمد قبل مايموت
غائب للأبد..ماحدش يكلمنى.. دى كانت الاستايتوس بتاعت احمد
فتحت معاه حوار..
مالك يابو حميد ايه اللى مضايقك؟؟
-مافيش ..حبة تعب كده
-احكى طب يابنى صدعنى biggrin.gif
-معلش مش هاقدر..لما بتكلم فى الموضوع ده نفسيتى بتنهار
(قلت فى سري..تلاقيه عنده مشكلة ولا لسه خارج من صدمة عاطفية ولا حاجة..حاله كحال معظم المخنوقين عندى ع المسنجر)
-طب ياعم فرفش كده امال..
-انا احتمال اسافر ومش هارجع تانى..ياريت لو كنت ضايقت حد يسامحنى..ادعيلي ربنا يغفرلي
المهم سيبته.. قولت حبة والواد هيرجع لطبيعته…عادى يعنى
لكن للأسف…احمد مارجعش تانى…
متخيل اما تكلم حد..ويكون عارف انه هيموت !!!
نخيل نفسك مكانه…تخيل نفسك على موعد مع الموت…تخيل نفسك عمال بتعد الايام اللى باقيالك فى الدنيا…طموحاتك احلامك..أمالك..حياتك..دراستك ..اصحابك..كل ده هينتهى بعد كام يوم…
صعبة اوى…


لا تركنن إلى الدنيا وما فيها *** فالموت لا شك يفنينا ويفنيها
المرء يبسطها والدهر يقبضها *** والنفس تنشرها والموت يطويها

الموقف التانى…. (المزيد…)

السلام عليكم…
مش عارف لييه كل ما تيجى سيرة الغباء افتكر

البراغيث

.. عندى احساس دفين جوا اعماق عقلي ان البراغيث اغبى شئ ممكن يتواجد على سطح الارض ..

اسف لا تحاول اقناعى بغير ذلك …. المهم يعنى .. اكيد انا لم افتح هذا الموضوع للتامل فى جمال البراغيث مثلا .. ولا اكنش ناوى اسرد عشرين طريقة لطرد البراغيث خارج بطانية سيادتك.. ده شئ يتعلق بالنظافة الشخصية.. ماليش دخل فى المسائل العائلية دى …

احم .. المهم عشان ماطولش يعنى ولان اكيد كل اللى بيقرا الموضوع دلوقت عمال

يهرش

.. فاختصارا للوقت وحفاظا على جلد حضراتكوا من البراغيث, هادخل فى الموضوع على طول بدون مقدمات…

النهاردة حصل حتة موقف

.. هابقي احكيه فى ا لاخر عشان الدنيا حر اصلا ومش ناقصة رخامتى ع المسا كده …

ندخل فى الموضوع بقي.. نبدأ الاول بسبب التسمية .. انا ليه سميت الموضوع كده ؟؟؟

الاجابة بسيطة ..

وانت مالك ياجدع

.. ناس حشرية بصحيح ..

لا بجد … انا حاسس بملل فظيع.. ملل يتخلل فى جميع اعضاء جسمى.. ملل بشع يكاد يكون املُ (تخيل ان اللى حرف اللام دى شده عشان مابعرفش اكتبها) من الملل نفسه…

طبعا انا مش عامل الموضوع ده عشان تسلونى ولا عاوز حد يزغزنى مثلا (مش عارف ايه علاقة الزغزغة بالملل .. بس اكيد فيه علاقة يعنى )

انا عامل الموضوع ده عشان الناس اللى زهقانه زى حالاتى كده ومش عارفين يعملوا..

فانطلاقا من مبدأ ..

اقتل الملل قبل ان يقتلك

( لسه مألفه حالا )

هنحط حبة حاجات كده عشان اللى زهقان يعملها فيقوم الملل يزهق منه ويحلف عليه بالطلاق ماهو راجعله..

نبدأ على بركة الله …

تنبيه بسيط بس .

. لو مش حاسس بملل بلاش تكمل احسن .. انت شايف الموضوع شكله عامل ازاى .. اللى حاى مش هايكون افضل من اللى فات يعنى ..

احم .. ممكن نتنيل على عيننا ونبدأ بقي .. جبتولى ملل بصراحة …

حاجة اخيرة بردوا …

ثق تماما انك اول ماتخلص قراية الموضوع ده .. لو

طبقت اللى فيه بشكل مظبوط

.. اوعدك هتبقي زى العفريت .. ولا اجدع ملل يحوق فيك بعد كده… وهتمشي فى الظلمة ولا تخااااف .. والبنات هيجروا وراك جرى القملة فى راس الاقرع… احم انا بقول ندخل ع الموضوع احسن..

نمرت واحد ( بتخنق اوى من الناس اللى بيقولوا كده .. نمرت واحد .. ماعلينا )

1- المصباح السحرى ….


( مدة التسلية المتوقعة 1-5 دقايق )
دور على لمبة .. واقعد بصلها كتييير .. بعد كده غمض عينك وفتحها بسرعة .. كتييير بقي وورا بعض .. هتلاقي نفسك بتشوف حاجات غريبه .. بعد كده غمضها اويييييييييييي لحد ما تحس انك هتتعمى …

2- بطارييييييييق….
( مدة التسلية المتوقعة 1-5 دقايق )
حاول لمدة 5 دقايق انك ما تفكرش فى بطريق …. ركزززززز جااامد .. اوعى تفكر فى البطاريق … عليا النعمة ما هتعرف biggrin.gif
(المزيد…)

السلام عليكم ورحمة الله …

امبارح بسبب الاخوة الاعداء اطال الله عمرهم …نيمونى الساعة تلاتة منهم للى كلت دراع جوزها ..

طبعا بسببهم هما بس… مش بسبب حد تانى ولا بسبب انى كنت قاعد ارغي معاهم …ماعرفتش اتنيل واروح مجموعة الكميا

اللى هيا كانت الساعة تمانية ونص الصبح ... قمت من السرير مدروخ ..وقعت ع الارض طفيت المنبه وكملت نوم

طبعا انا مش فاتح الموضوع ده عشان اشتم فيهم ولا حاجة .. ولا عشان اطلب محاضرة الكميا من حد ..هابقي افتح موضوع خاص بالمحاضرة عشان الموضوع ده ما يتفرعش بس ..وبالمرة هابقي اشتمهم فى موضوع الكميا

المهم …كملت نوم لحد الساعة حداشر كده …صحيت فطرت كالعادة ….الخ الروتين بتاع يوم الجمعة ده يعنى ..

المهم لقيتلك عفيفي بيتصل بيا .. ايه يابنى فينك ..قلتله فى البيت .. قالى ماجيتش ليه ؟؟؟ مش محتاجة ذكاء يعنى .. اكيد عشان فى البيت .. معلش بس هو بيحب يستذكى كده ساعات …قالي طب يللا البس وانزل عشان رايحين الكورس ..قلت طيب وقفلت السماعة على انى داخل انام حبة قبل الصلاة وهافكس للكورس …. عشان عندى سيشن اكسبلور الساعة اربعة .. والكورس بيخلص الساعة اربعة .. فكده هاتعب جامد اوى …. مش كفاية روحت المجموعة ….اه صحيح ده انا ماروحتش …عادى كانى روحت .. كان نيتى اروح بصراحة …

المهم عشان مانخرجش بره الموضوع ….قررت انى البس واروح الكورس واتخلى عن الساعة دى
لبست ونزلت جرى … طبعا مش هالحق اركب ميكروباص .. فقررت قرار انتحارى .. انى هاخد تاكسي ..دفعت دم قلبي فيه طبعا ولسه بدعى ع الراجل لحد دلوقت …

عشان ننجز بس .. هافوت الحتة بتاعت الكورس دى وادخل على سيشن ااكسبلور على طول .. احنا لسه فى اول اليوم .. كده مش هانلحق …

المهم يعنى هابدأ من سيشن اكسبلور عشان عاوز ادخل فى الموضوع …. طبعا انا مش فاتح الموضوع عشان اكسبلور … اكسبلور هابقي افتحلها موضوع تانى لوحدها عشان ماخرجش بره الاطار العام للموضوع
(المزيد…)